Europa League
Torsdag 20. april kl. 21.00
Estádio Ramón Sánchez Pizjuán, Sevilla
Innbyrdes:
Manchester United: 0
Uavgjort: 2
Sevilla: 2
Skader United: (det hadde kanske vore lettare å liste opp dei friske og raske?)
Ok, vi tar sats: Heaton, Varane, Martínez, Shaw (usikker), Malacia (usikker), Van de Beek, Sabitzer (usikker), McTominay (usikker), Garnacho, Rashford (usikker). I tillegg er Bruno suspendert...
Seier i Sevilla?
Ja, det er jaggu på høg tid. Vi jaktar framleis på vår første triumf mot dei raud-kvite frå Andalucía, og når det ikkje blei seier forrige torsdag på Old Trafford, kan ein lure på om det nokon gang kjem til å skje. Sevilla sin nesten absurde evne til å ta seg vidare i, og til slutt vinne, UEFA-cupen/Europa League kan også tale for spansk avansement, men éin gong må flaksen ta slutt. Eventuelt må vi prøve å grave opp den andalusiske hunden som må ligge begravd bak det eine målet på Sánchez Pizjuán. Sevilla slit nemleg voldsomt i heimleg serie og såg ut som eit svært ordinært lag i 85 minutt i det første møtet. Vi manglar ein heil førsteellevar til returmøtet, mens heimelaget må klare seg utan VM-helten Gonzalo Montiel.
United har akkurat slått Nottingham Forest på ein overbevisande måte og det er betryggande med Christian Eriksen tilbake på midtbana. Kanskje vil han få Bruno si rolle på Sánchez Pizjuán? Det er også knytt spenning til om Shaw, Sabitzer og ikkje minst Rashford vil bli klare til dysten i den andalusiske hovudstaden, og eg vil ikkje vedde på at Ten Hag har ikkje eit par triks gøymt under pologensaren.
Kva skal vi seie om heimelaget? Sevilla FC er den eldste og mestvinnande klubben frå Andalucía og har som nemnt utvikla ein spesialkompetanse til å vinne Europaligaen, eller Unai Emery-cupen, som han visstnok blei omdøypt til. Heimebana til klubben, Estádio Ramón Sánchez Pizjuán, som er oppkalla etter ein tidlegare klubbpresident, ligg i den fasjonable og velståande bydelen Nervión, som også er finanssentrumet i Sevilla.
Sevilla FC har tradisjonelt sett vore overklassens lag i byen, mens Betis har vore arbeidarklasselaget. Sevilla FC blei grunnlagt i 1905, hovudsakleg av britiske gruvearbeidarar. Etterkvart vart laget overtatt av dei velståande spanske gruveeigarane, som visstnok ikkje ville ha kven som helst på laget. Då éin av direktørane etter sigande nekta å signere ein spelar p.g.a. arbeidarklassebakgrunnen hans, vart det eit salig rabalder og utbrytarar frå Sevilla FC grunnla det som seinare skulle bli Real Betis Balompie. Dei to klubbane er framleis bitre rivalar den dag i dag.
Vi kan nesten ikkje snakke om Sevilla FC utan å nemne det flotte emblemet deira.
Ikkje berre er fargane flotte, men dei har sanneleg klart å presse inn heile tre helgenar oppe i det venstre hjørnet. Sjølv i ein stolt katolsk by som Sevilla er dette ei imponerande bedrift. La oss presentere herremennene: San Isidoro var ein skriftlærd teolog, som både var ein kløppar på teiknsetting og birøkting og som også fungerte som biskop av Sevilla i 32 år. Fernando III rakk å vere konge over Castilla, León og Galicia før han døydde av ei væskeansamling i kroppen då han var såvidt 50 år gammal. Han er mest kjend for å drive maurarane tilbake frå store delar av Spania. Tredjemann i trioen er San Leandro, som i tillegg til å vere bror av San Isidoro, var ein viktig person i spreiinga av katolisismen blant dei vestgotiske kongane på den iberiske halvøya.
Vi kan kanskje ikkje skilte med like mange helgenar som torsdagens motstandarar, men vi har Antony Dos Santos (direkte omsett: av helgenane). Han er kanskje ikkje like from og flink med bier som dei nemnde herrane i Sevilla sitt klubbemblem, men venstrefoten hans er langt meir treffsikker. På torsdag blir det Saint Antony's Day!
.
Manchester bien 
-Og flotte oppdateringer fra dere andre også! Lærte igjen en hel del. Det er jo ikke bare sport dette; men også kultur, historie, relligion, kunst og dyrehold! Dere må jo være kløppere i quiz og TP opp til flere av dere! 
