MANCHESTER UNITED - Nottingham Forest
Premier League
Tysdag 27.12.2022 kl. 21.00.
Old Trafford, Manchester
Innbyrdes
Manchester United: 48
Uavgjort: 24
Nottingham Forest: 33
Skader United
Dalot (hamstring) - svært usikker
Maguire (sjuk) - usikker
Sancho - tja, den som visste det...
Varane (vonbroten) - utvida ferie
Martínez (truleg tidenes Fernet-hangover) - mentalt og fysisk på den andre sidan av kloden
Premier League
Tysdag 27.12.2022 kl. 21.00.
Old Trafford, Manchester
Innbyrdes
Manchester United: 48
Uavgjort: 24
Nottingham Forest: 33
Skader United
Dalot (hamstring) - svært usikker
Maguire (sjuk) - usikker
Sancho - tja, den som visste det...
Varane (vonbroten) - utvida ferie
Martínez (truleg tidenes Fernet-hangover) - mentalt og fysisk på den andre sidan av kloden
Ut frå dvalen
Då var vi endeleg i gang igjen! Underteikna har vakla seg ut frå hiet, sveltefora på skikkeleg fotball og klar for å fortære enorme mengder med Ten Hags julespesialitetar. Forretten mot Burnley var framifrå. Casimirske delikatesser, Rashfordske godsaker og lekre Wan-Bissakabiskener gjorde underverk for ein underernært (nesten) VM-fråhaldsmann.
Det kjennest på nokre måtar ut som ein ny start midt i sesongen. Ronaldo og sirkuset rundt han er borte og det vert spennande å sjå korleis det slår ut på spelargruppa. Dei fleste VM-spelarane har vendt tilbake utan store lyter, sjølv om skaden til Dalot er uavklart i skrivande stund og Licha Martínez nok framleis er prega av feiringa av den nye argentinske nasjonaldagen. Det er imidlertid grunn til å tru at treningsleiren og kampane som den heimeverande troppen har gjennomført i Spania, vil ha heldige konsekvensar for resten av sesongen. Lydane som kjem ut frå klubben tyder iallefall på at Manchester United er ein meir harmonisk og robust klubb enn for seks månader sidan.
Kva så med gjestene frå det austlege Midlands? Det er noko Robin Hoodsk over den gjengen til Steve Cooper. Skogvoktarane anno 2022 såg ei stund ut som ein samanraska gjeng med meir eller mindre brukande leigesoldatar, noko som kanskje ikkje er rart når ein henta inn 344 nye spelarar før sesongen. Den joviale walisaren har etterkvart fått meir struktur og styr på sine muntre menn og har nesten karra seg bort frå nedrykksplassane. Høgdepunktet var då dei "stal" tre poeng frå Sheriff Jürgen av Merseyside med eit vel utført sjokkangrep på City Ground, noko som førte til at Scousarbanden måtte vende heim med tomme pungar og megen tenners gnissel.
Då eg såg den innbyrdes statistikken mellom United og Forest stussa eg over kor få møte det har vore mellom dei to klubbane. No var rett nok ikkje Tricky Trees eit etablert toppserielag før på slutten av 50-talet, men ein annan hovudgrunn er at United ikkje har fått besøk av Forest sidan Boxing Day i 1998. Då Skogvoktarane sist vitja Old Trafford sto Dave Beasant i mål, Steve Chettle var forsvarssjef og Steve Stone, Dougie Freedman og Neil Shipperley var dei beste angrepsvåpena til Forest. United sitt beste angrepsvåpen den dagen var Ronny Johnsen, som like godt scora to mål i ein komfortabel 3-0-seier.
Ein skulle kanskje tru at nemnde herr Johnsen skulle bli den mestscorande norske Unitedspelaren mot Forest den sesongen, men Ole Gunnar Solskjær hadde andre planar. I det hittil siste møtet mellom dei to raude laga, kom nordmøringen inn frå benken og scora fire mål på ti minutt i ein utruleg 8-1-seier, som tilfeldigvis vart spela på 41-årsdagen for München-ulukka.
Å tru på eit liknande resultat på tysdag, vil nok vere som å tru på ein korpulent raudkledd herremann med tvilsom skjeggpryd og endå meir tvilsomme innbrotsvaner nattestid, men det er vel tida for slikt no.
God RAUD jul til alle saman!